أكدت الناشطة الحقوقية نرمين يسري صحة ما يتم تداوله عبر مواقع التواصل الاجتماعي، عن وجود ثعابين بسجن القناطر، مشيرة إلى إمكانية وصول بعض الثعابين الخطيرة مثل "الكوبرا" إلى داخل السجن إذا استمر الوضع كما هو.

وقالت- عبر منشور لها على "فيسبوك"- "طيب أنا من امبارح قاعدة بقرأ في كل المصادر اللي لقيتها عن أنواع الثعابين الموجودة في مصر (على خلفية الثعابين اللي بترتع في عنابر سجن القناطر)، للأسف المصادر مش كتير والمعلومات مش دقيقة.. لكن اتأكدت على الأقل إن فيه من أنواع الثعابين الخطيرة زي الكوبرا و الـ vipers بيعيشوا في الزراعات عادي، مش بس في الصحرا زي ما كنا فاكرين."

وأضافت: "طبعًا صعب جدًا نطلب من البنات وصف للثعابين اللي بيشوفوها عشان نحاول نحدد دي ايه و ايه مدى خطورتها، لكن احتمال مش بعيد إن يبقى فيه من الثعابين دي سامة.. بعض الأنواع السامة بتزحف بسرعة 20 كيلو في الساعة، يعني صعب جداً حد يجري منها، وسمها يقتل بني آدم بالغ في نص ساعة".

وتابعت "يسري": "يعني نقول تاني؛ المسجونات في سجن القناطر بيشتكوا بقالهم كذا يوم من وجود ثعابين في العنابر، منها ثعبان كبير محدش عرف يقتله، ومن وجود بيض ثعابين كمان في شقوق العنابر.. طبعاً العنابر دي مقفولة على سكانها المسجونين أغلب اليوم، فتخيلوا الرعب إنكم مسجونين في مكان واحد مع تعابين!! فيه بنات مش بتقدر تنام من الرعب! وتخيلوا كمان لو تعبان سام -لا قدر الله - عضّ مسجونة أو حاجة، تعتقدوا بالروتين العقيم بتاعهم ده هيلحقوا ينقلوها مستشفى او مركز السموم قبل ما يجرالها حاجة؟؟""

واستدركت : "أبسط حقوق المسجون انه يعيش في مكان آمن على الأقل .. أهالي المسجونات مستعدين يدفعوا ثمن التخلص من التعابين دي وسد شقوق وجحور الزنازين لمنع رجوعها، بس محدش بيسمعلهم للاسف.. خليكم صوتهم طالبوا معانا بتطهير سجن القناطر من التعابين عشان المسجونات يقدروا يعيشوا فيه".

وفي الأيام الأخيرة، امتلئ سجن القناطر بالثعابين التي تهدد حياة المعتقلات المتواجدات داخل السجن، وسط تهديد لهن من قبل الإدارة بحبسهن انفراديًا حال نشر الأمر.