إهداء إلى كل ضابط وعسكري مخلص واقف في مزرعة سمكية فى عز البرد .

إلى كل ضباط الجيش المصري الشرفاء .

 

على خط الجمبرى

واقف زى الحديد

وعنيك فى وسط راسك

شايل سلاح جديد .

قناص بيأدى واجبه .

ويخش فى المفيد .

وبيصطاد الأعادى .

بالشبكة من بعيد .

لو كان سمك كابوريا

أو كان قرموط عنيد .

الرائد المقاتل

حيجيب حق الشهيد .

حيجيب حق الشهيد .

.

.

على خط الجمبرى .

اعمل تعظيم سلام .

لحضرة المقدم .

وللرائد حسام .

وحنكيد الأعادى .

ونطرد اللئام .

وبنقطع الرؤوس .

ونرصها بنظام .

ونقطع الزعانف

وكله فى التمام .

ويشبع المواطن

وتفرح المدام .

وتفرح المدام .

.

.

على خط الجمبرى

اعمل سمك فليه .

واحد على الميزان .

واحد يفرش عليه .

ونورد للمطاعم .

ونسيطر ع المنيه .

أحسن سمك يا هانم

أنضف سمك يا بيه .

أنضف سمك يا بيه

.

.

على خط الجمبرى .

والحرب فى الميدان .

وخدمة المزارع

خدمتنا للأوطان .

ونقطع أي سمكة

وبنشويها كمان .

ما يهمناش زفاره

ما يهمناش دخان .

ما يهمناش دخان

.

.

على خط الجمبرى

للقادة وللجنود .

مش لازم طيارات

ولا نحرس الحدود .

ما يهمناش أفارقة

ما يهمناش يهود .

نتغلب ع المؤامرة

ونهدم السدود

بلطى وسمك فليه

أمجادنا راح تعود .

أمجادنا راح تعود ...

.

.

على خط الجمبرى .

واقف زى العريس .

السيد المقدم .

وحضرة الرئيس .

شكرا أخى المفوض

شكرا إعلام لميس .

ألفين سلام مربع .

وتحية من إبليس .

وتحية من إبليس .

.