روت سيدة تفاصيل مقتل زوجها على يد جاره؛ بعدما ظن الأخير أنه تسبب في طرده من عمله بمخبز بلدي بناحية كفر "الشيخ الظواهري" التابع لمركز ههيا.

وقالت"هناء لطفي محمد" ربة منزل، إن زوجها كان رجلا بسيطا ويبحث عن عمل إضافي ليُحسن دخله، خاصةً وأنها حامل، وأم لطفلتين (أمل – 7 سنوات) و(سما – 5 سنوات): "جوزي كان شغال باليومية، وبصراحة كان اللي جاي مش مكفي اللي رايح، لكن كنا مستورين، وهو من ناحيته كان بيدور على أي حاجة تانية جنب شغله".

وأضافت الزوجة:"ربنا كرمه وعرف طريق فرن في البلد هنا، اشتغل هناك علشان يحسن دخله، وأنا من ناحيتي كنت بشتغل أنا كمان باليومية كل ما ألاقي نفسي قادرة".

وتابعت : "كنت بروح أعجن في الفرن اليوم بـ 30 جنيه، لكن الله يجازيه سمير زميله هناك، في يوم شافني وشتمني من غير سبب".

وأردفت الزوجة: "أول ما حكيت لجوزي، اتصل بصاحب البيت اللي فيه الفرن واشتكى له، وبعدها صاحب الفرن مشى سمير، لكن التاني كان فاكر إن جوزي السبب في مشيه من هناك، وفضل وراه لحد ما قتله".

وعن تفاصيل يوم الحادث، أوضحت الزوجة: "يومها كان دسوقي خلص شغله في الفرن وراجع على البيت.. مكانش عارف يا حبيبي إنها آخر رجوعه له.. كان سمير متربص له وخده على خوانة وطعنه قصاد أهل البلد كلهم.. منه لله.. أنا عاوز حقي.. لازم القاتل ياخد جزاه".

وتوفي "دسوقي محمد منجد عبد المقصود" 40 عامًا، عامل زراعي، مُقيم بكفر "الشيخ الظواهري" بمركز ههيا، متأثرًا بإصابته بجرح قطعي بالفخذ أدي إلى حدوث نزيف أودى بحياته.

وتبين حدوث مشادة كلامية بين المتوفى والمدعو "سمير.م.ز" 50 عامًا، عامل، ومُقيم بذات الناحية، تطورت إلى مشاجرة تعدى خلالها الثاني على الأول بآله زراعية "مِنجٌل" ما أدى إلى حدوث إصابته التي أودت بحياته؛ وذلك لاعتقاد الثاني بتسبب الأول في طرده من عمله في مخبز بلدي بذات الناحية.