حجم الخسارة كبير

يا أوطانى

حجم الخسارة كبير

إزاى نغير

فى المعركة

من غير سيوف الله

ولا الفرسان

ولا الخيل الأصيل

وإزاى نواجه أبرهه

وإحنا عبدنا الفيل

ودمرنا بإيدينا قوة

الأبابيل

ورمينا النبي

بحجارة السجيل

وإزاي نواجه إسرائيل

والف بلتاجى ورا القضبان

والف حازم أبو إسماعيل

يا وطن بيسحق عظم عشاقه

راح تعمل إيه وقت إحتدام المعركة

وإنت بتتجرع كاسات الموت

وأنخاب الهزيمة

حاول ساعتها تفتكر

إن القلوب السليمة

إتلقت الرصاصات

عند الحرس فى الفجر

وإن اللى مات

كان بدر

بينورلك السكة

وأنه إتقتل قدام عنيكم غدر

حاول ساعتها تفتكر

إن العيال فى المنصة

كات بتخبز بكرة

بقلوبها اللى عاشقه النور

وإن اللى كسر الماجور

وكب العجين

وعلا السور

وخلاك سجين

يوم لما يحمى الوطيس

هيسيب بهية تموت فطيس

عمر اللى رفع البندقية فى وش أحبابك

فى يوم ما يصون ترابك

عمر اللى حرق الناس

فى قلب النهضة

وف رابعة

وهى بتستغيث

ماهينقذك م الفقر أو م الموت

عايزك بقى تصرخ بعلو الصوت

مين ينجدك ياوطن

من دعوة المظلوم

إشرب فى كاس الهموم

وإدفع فاتورة الدم

آن الأوان تندم

يا اللى رقصت على الجثث

وقتلت أطهر ناس

أبقى إفتكرهم وإنت خدك مداس

لكل ظالم وندل

ويوم ما تنزل دموعك

وتحس ألمك وجوعك

يبقى إبتديت فى القصاص

وربك إسمه العدل